Светската здравствена организација (СЗО) на вчерашната редовна прес-конференција препорача да се носат маски како еден од начините за заштита од COVID-19.
СЗО, која одржува прес-конференции трипати неделно за да известува за новостите и измените во поглед на состојбата со пандемијата, препораките и протоколите за заштита од коронавирусот, ја даде препораката за носење маска откако неколку светски лидери јавно коментираа на темата дали и кога треба да се носат маските.
Генералниот директор на СЗО, Тедрос Гебрејесус, рече дека сака да зборуваат за тоа кој сѐ треба да носи маска, од какви материјали треба да биде направена и кога треба да се носи како заштита од коронавирусот.
„Сакам јасно да ставам до знаење дека препораките кои ги објавуваме денеска се ажурирање на она што го кажуваме со месеци: маските треба да се користат како дел од сеопфатна стратегија во борбата против COVID-19“, рече тој.
„Земајќи ги предвид најновите докази, СЗО им препорачува владите да ги охрабрат граѓаните да носат маски онаму каде што има широка распространетост на заразата и каде што е тешко да се одржува препорачана физичка дистанца, како на пример во јавен превоз, во продавници и во други затворени простории каде има голем број луѓе“, рече тој.
Врз основа на две научни истражувања, СЗО ги советува луѓето да носат маски што се состојат од најмалку три слоја различни материјали/ткаенини, кога се одлучуваат за немедицински текстилни маски.
СЗО предупредува дека само носењето маска не е доволно за заштита од зараза, ако не се почитуваат и другите мерки. Оттаму нагласуваат дека луѓето со симптоми на коронавирусот треба да останат во изолација и да побараат лекарска помош.
По соопштувањето на препораката од СЗО, преку социјалните мрежи се огласи и македонскиот министер за здравство, Венко Филипче, кој нагласи дека оваа мерка веќе ја имплементираме кај нас, покрај физичкото растојание и честото миење на раце.
„Задоволен сум што носиме вистински одлуки за заштита на здравјето на нашите граѓани. Апелирам да продолжиме да ги почитуваме мерките и заеднички да придонесеме кон спречување на ширење на овој вирус“, истакна Филипче.