Светската здравствена организација соопшти дека во последните 24 часа во светот се регистрирани нови 212.326 случаи на коронавирус, што е рекордно дневно зголемување на бројот на нови случаи.
Најголем дневен скок, според бројот на заразени лица, имаат САД, Бразил и Индија, пренесуваат британските медиуми.
Претходниот црн рекорд, според бројот на инфицирани на дневна основа – 189.077, беше регистриран на 28 јуни.
Секој ден од COVID-19 во светот умираат околу 5.000 лица.
Повеќе од 11 милиони лица ширум светот се заразени од вирусот од почетокот на епидемијата, а повеќе од половина милион веќе умреа.
Бразил веќе 50 дена е без официјален министер за здравство, додека во земјата се регистрирани повеќе од 1,5 милиони случаи на коронавирус.
Оваа функција привремено ја извршува генералот Едуардо Пачуело, кој нема никакво претходно медицинско искуство, бидејќи последниот министер за здравство, Нелсон Теих, поднесе оставка на 15 мај.
Теих, кој на функцијата мина помалку од еден месец, се повлече по критиките од претседателот Жаир Болсонаро дека е „премногу плашлив да ја отвори економијата и дека се залага за употреба на лекот хлорокин“. Тој, меѓутоа, не ја изнесе вистинската причина за оставката, а неговиот претходник Луиз Мандету беше отпуштен од Болсонаро, потсетува CNN.
Болсонаро, кој често пати им се спротивставува на насоките за социјално дистанцирање, препорачани од повеќето здравствени експерти, и за вирусот вели дека е „мал грип“, е под постојана и сериозна критика за намалување на сериозноста на епидемијата.
Под привремената команда на генералот Пачуело, повеќе од 20 стратешки позиции во Министерството за здравство се зазамени од воени лица. Најголемата критика против него, сепак, дојде кога по наредба на Болсонаро и желбата да се намалат негативните последици од големиот број смртни случаи, го смени форматот на презентација на податоците. По силен домашен и меѓународен притисок, Врховниот федерален суд донесе одлука податоците да мора да бидат објавени како што се правеше претходно.
Со повеќе од 1,5 милиони потврдени случаи и најмалку 63.144 смртни случаи, Бразил се наоѓа на второто место во светот, зад САД.
