Талибанците денеска, за прв пат откако се вратија на власт во Авганистан, извршија јавна егзекуција, егзекутирајќи човек осуден на смрт за убиство.
Јавната егзекуција беше извршена во Фарах, на западот на земјата, откако пред неколку недели врховниот лидер на талибанците, Мула Хаибатула Ахунџада нареди најстрога примена на исламскиот закон.
„На Врховниот суд му е наредено да ја спроведе пресудата ‘око за око, заб за заб’ на јавно место за собирање во Фарах“, рече портпаролот на талибанците Забихула Муџахид.
Осуденикот Таџмит, син на Гулам Сарвар, беше осуден за убиство на маж и кражба на мотоцикл и мобилен телефон, се вели во соопштението за печатот. Се наведува и дека сторителот на делото бил идентификуван од неговото семејство и дека потоа го признал делото.
По враќањето на власт, талибанците ветија дека ќе бидат поблаги во примената на шеријатскиот закон, но набрзо се вратија на ригидно и ригорозно толкување на верскиот закон, како за време на нивното прво владеење од 1996 до 2001 година. Тие јавно казнуваат силување, киднапирање или прељуба, најчесто со ампутација на орган или каменување.
