Режисерите на „Медена земја“, Тамара Котевска и Љубо Стефанов, како и продуцентот Атанас Георгиев, присуствуваа на настан за претставување на документарците номинирани за Оскар годинава, во организација на Американската академија за филмска уметност и наука.
Настанот се одржа во текот на неделата пред доделувањето на Оскарите на 9 февруари.
Во категоријата Најдобар документарен филм „Медена земја“ влезе во потесниот избор за номинација од 159 документарци. Конечно, филмот беше номиниран заедно со American Factory (кој го освои Оскарот во оваа категорија), The Cave, The Edge of Democracy и For Sama.
Кинематографијата за филмот кој исто така беше номиниран и за Најдобар странски филм, е на Фејми Даут и Самир Љума.
Пред претставувањето на документарецот, Котевска сподели едно лично видување за состојбата на уметноста, а поконкретно филмската уметност.
„Завршија времињата кога на овој свет му требаше уметност за да ја преживее вистината. Сега сметам дека нештата се променија. Сега навистина ни треба вистината за да може да ја преживееме целата бесмислена уметност што ни го одзема вниманието“, рече Котевска во воведниот говор.
Во продолжение погледнете ја снимката од настанот на кој се претставија екипите на номинираните документарци. Обраќањето на екипата на „Медена земја“ почнува во 1:50:30.
