По убедливиот пораз во првиот натпревар хокејарите на Тампа Беј Лајтнинг успеаја да го вовратат ударот и да израмнат на 1-1 против Далас Старс во најквалитетната хокејарска лига на светот.
Со фуриозни 5 минути во вториот дел од првата третина, хокејарите на Тампа поведоа со убедливи 3:0 и најавија победа. Прв гостинската мрежа ја начна Брејден Поинт во 12. минута и тоа во моменти кога противникот беше со играч помалку поради исклучувањето на Џо Павелски.
Само три минути подоцна Тампа уште еднаш искористи играчка предност, овој пат Џејми Олесиак беше исклучен, а Чехот Онджеј Палат погоди за 2:0.
Третиот гол падна минута подоцна, но овој пат кога двата тима сеа изедначени. Беше дело на Кевин Шатенкирк кој од далечина успеа да го најде патот до мрежата.
Далас Старс упсеа да врати еден гол во 15. минута од втората третина преку Павелски кој мајсторски го смени правецот на ударот на Јон Клинбериј, додека за неизвесна завршница се погрижи Швеѓанецот Матијас Јанмарк во 6. минута од последната третина, повторно на асистенција на Клинбериј. Сепак, до крајот резултатот остана непроменет и резултатот во партии се израмни на 1-1.
Третиот натпревар е на програмата во четврток рано сабајле во 2 часот по македонско време.