Минатата недела, Вашингтон ги блокираше сите средства и активи на државниот венецуелски гигант за нафта и природен гас PDVSA под негова јурисдикција и им забрани на американските компании да соработуваат со компанијата.
Во петокот, Државната благајна на САД соопшти дека ќе ги олесни рестрикциите ако венецуелскиот опозициски лидер Хуан Гуаидо преземе контрола врз компанијата.
Флота танкери што пренесуваат околу 7 милиони барели венецуелска нафта се заглавени во Мексиканскиот Залив, а дел од нив се смета дека носат нафта нарачана и купена уште пред да бидат воведени санкциите од САД, а други се натоварени со нафта за која купувачите на знаат кому да платат, објави Reuters наведувајќи податоци и извори од трговци, шпедиции и експерти во индустријата.
Пред да бидат воведени санкциите на 28 јануари, рафинериите во САД купуваа во просек по 500.000 барели сирова венецуелска нафта дневно. Сега поради санкциите мора да ги плаќаат преку депозитни сметки под контрола на самопрогласениот привремен претседател Гуаидо. Но, овие сметки уште не се отворени.
Како резултат на ваквата ситуација, повеќе од десетина танкери на компании како Chevron Corp, рафинеријата на PDSVA - Citgo Petroleum - и Valero Energy, сега се заглавени во Мексиканскиот Залив и низ водите на Венецуела, чекајќи исплата и инструкции за испорака.
Венецуела ги има најголемите резерви на нафта во светот. Политичката ситуација во земјата се влошуваше веќе некое време, а ескалираше минатиот месец кога опозицискиот лидер Гуаидо се самопрогласи за привремен претседател по телефонски разговор со американскиот потпретседател Мајк Пенс.
САД, Канада и десетина европски земји изразија поддршка за обидот за државен удар, а Русија, Кина, Мексико, Куба, Боливија, Никарагва, Иран и Турција покажаа солидарност со демократски избраниот претседател Николас Мадуро и ги повикаа големите светски сили да не се мешаат во внатрешните работа на Венецуела.
