Јунакот на Милан во вчерашното дерби вели дека внимателно проучувал како Лаутаро Мартинес изведува пенали, што се покажа како добро потрошено време.
Поранешниот репрезентативен голман на Романија синоќа беше помеѓу стативите на Дербито дела Мадонина. Тој е всушност резервен голман на Милан, но бидејќи првотимецот Мајк Мењан е повреден, Чиприан Татарушану ги облече ракавиците.
Имаше доста работа бидејќи неговите соиграчи двапати фаулираа во казнетиот простор. Првиот пенал не успеа да го одбрани бидејќи Хакан Чалханолу го надмудри, но затоа го одбрани оној вториот кој го изведе Лаутаро Мартинес.
„Заедно со тренерскиот тим внимателно ги анализирав пеналите на Лаутаро, бидејќи тој е прв пеналџија во тимот. Што се однесува за Чалханолу, него веќе го знам многу добро, но проблемот е што и тој ме знае мене“, вели Татарушану за DAZN.
На трибините можеше да се забележи како неговиот колега Мењан се радува на одбранетиот пенал заедно со останатите повредени соиграчи, како Алесио Ромањоли и суспендираниот Тео Ернандес.
„Правам сѐ што можам за да продолжам во оваа форма. Мењан се радуваше затоа што знае што значи за еден голман да се одбрани пенал. Ние добро се согласуваме. Откако дојде во Милан се обидов да му помогнам да се приспособи, особено поради тоа што јас зборувам француски“, додава Романецот.
Втора сезона е во Милан, но и лани беше резерва, тогаш на Џиџи Донарума. Со 35 години јасно е дека тоа така и ќе остане, а секоја прилика ќе се обиде максимално да ја искористи.
„Мењан имаше добар старт на сезоната, но потоа се повреди. Секогаш тренирав напорно со цел да бидам подготвен кога клубот ќе има потреба од мене, и еве, моментот дојде“.
