Таткото на Новак Ѓоковиќ беше снимен како позира со навивачи кои вееја руски и проруски знамиња на Австралија опен. Украинскиот амбасадор рече дека ваквите сцени се срамни.
По натпреварот помеѓу Новак Ѓоковиќ и Андреј Рубљев, група навивачи покажаа руски знамиња во близина на теренот каде се играше полуфиналниот натпревар на АО, меѓу кои и она со ликот на Владимир Путин, извикувајќи проруски пароли.
Tennis Australia соопшти дека четири лица „изложиле несоодветни знамиња и симболи и му се заканувале на персоналот за безбедност“. Била повикана полиција и тие биле исфрлени од Мелбурн парк.
На видеото се гледа како таткото на Ѓоковиќ, Срѓан, позира со маж кој го држи знамето на Путин. Видеото можете да го погледнете ОВДЕ.
Српските тениски новинари потврдија дека тоа е таткото на Ѓоковиќ, а весникот Melbourne Age објави дека тој на српски рекол: „Да живее Русија“.
На гледачите им е забрането да носат руски или белоруски знамиња на Грен слем турнирот, откако амбасадорот на Украина во Австралија и Нов Зеланд, Васил Мирошниченко, побара забрана, откако такви реквизити беа видени во публиката минатата недела.
AFP фотографираше друг маж на трибините за време на мечот на Ѓоковиќ облечен во провоена маица со симболот „Z“.