Британското семејство не потврди, но ниту ги негираше информациите дека таткото на Меган Маркл ќе ја пропушти венчавката на својата ќерка во сабота, односно останува неизвесно дали ќе ја испрати до олтарот на венчавката со принцот Хари во дворецот Виндзор.
До венчавката за која се зборува веќе цела година останаа уште само пет дена, а американскиот магазин „TMZ“ објави дека Томас Маркл, таткото на Меган, нема да присуствува на венчавката откако е откриено дека тој наводно објавил лажни фотографии на кои прави подготовки за венчавката.
Истиот извор пренесува и дека Томас Маркл пред шест дена доживеал срцев удар и дека токму поради тоа нема да дојде на венчавката, како и тоа дека самиот изјавил дека нема да дојде за да не ја засрами ќерка си или кралското семејство.
Како резултат на ова се огласи и Кенсингтонската палата, од каде соопштија дека принцот Хари и неговата вереница Меган Маркл ја молат јавноста за разбирање и почит.
„Ова е многу личен момент за госпоѓицата Маркл во деновите пред венчавката. Таа и принцот Хари повторно бараат разбирање и почит и за господинот Томас Маркл во оваа тешка ситуација“, стои во официјалното соопштение.
Според овие информации, портпаролот на кралската палата ниту негираше ниту потврди дали таткото на Меган Маркл ќе присуствува на венчавката, односно дали ќе ја испрати до олтарот.
