Лео Меси и натаму се поврзува со експресно враќање во Барселона, а татко му само што додаде масло во оганот на тие шпекулации.
Таткото на Лео, Хорхе Меси, даде изјава за каналот Jijantes FC на Twitch околу можноста неговиот син да се врати во каталонскиот клуб. Беше начекан на аеродромот „Ел Прат“ каде не можеше да им избега на прашањата на упорните новинари, па кратко изјави:
„Се надевам (ќе се случи), еден ден“, кратко кажа тој.
Претходно и тренерот на Барса, Чави Ернандес, изјави дека се надева дека Меси ќе се врати на „Камп Ноу“.
Меси минатото лето си замина од Барса и тоа како слободен играч, без отштета, но имаше разочарувачка прва сезона во ПСЖ. Му требаше долго време за да се адаптира на стилот на игра во Франција каде во Лиг 1 на 25 натпревари постигна едвај 6 гола. Затоа, во Лигата на шампионите на 7 натпревари погоди 5 пати, но бадијала кога ПСЖ беше елиминиран уште во осминафиналето.
И покрај изјавата на Хорхе Меси и желбите на Чави, претседателот на Барселона, Жоан Лапорта, во март изјави дека клубот не планира да го враќа Меси назад, барем не во блиска иднина.
Тогаш говорејќи за RAC 1 изјави: „Не сум добил никаков знак од Меси или од неговиот агент за можно враќање во Барселона. Моментално немаме намера да го воскреснуваме тоа прашање“.
Меси во јуни ќе наполни 35 години.
