Пејачката Тејлор Свифт веќе издаде еден албум годинава, но бидејќи не можеше да престане да пишува, на публиката ѝ претстави уште едно издание.
Со истите соработници, но и со некои нови, таа направи продолжение на албумот „Folklore“. На тој начин таа има уште еден адут за да се натпреварува за место меѓу најдобрите оваа година, непосредно пред нејзиното завршување.
И засега планот ѝ успева: албумот направи вистински земјотрес на музичките топ листи преку ноќ!
Го најави на својот профил на Instagram, само неколку часа пред објавата. Сега е тука и веќе ги „окупира“ звучниците и слушалките ширум светот. Деветтиот студиски албум „Evermore“ носи 15 нови песни, кои авторката ги нарече „сестринско издание“ на нејзиниот албум „Folklore“, кој исто така ненадејно го претстави во јули годинава.
Ќе има и две бонус песни на луксузното физичко издание. „Evermore“ несомнено се потпира на претходното издание со звукот, а успешниот тим кој работеше на албумот останува непроменет - Џек Антонов, Арон Деснер од групата „The National“, како и Џо Алвин.
Колегите ѝ се придружуваат на Тејлор во три соработки -„HAIM “во „No body, no crime“,„The National“ во„Coney Island“ и Бон Ајвер во насловната песна „Evermore“. Oбјавен е и спот за првата песна - „Willow“.