Шпанската полиција ги најде телата на жена од Германија и нејзиниот 10-годишен син во пештера на островот Тенерифе и го уапси нејзиниот сопруг.
Локалните медиуми пишуваат дека другото дете на двојката, петгодишно момче, било најдено извалкано со кал и расплакано, откако некое време лутало само низ планината во близина на Адехе.
Локалните жители кои го нашле го однеле во полиција каде детето кажало дека мајка му и брат му се мртви во пештера.
Потрагата по жртвите беше тешка со оглед на тоа дека во оваа област има многу пештери. Жртвите биле најдени со помош на детето, а таткото подоцна бил уапсен во неговиот стан на Тенерифе.
Жртвите најверојатно биле претепани до смрт, но не се знае дали починале во пештерата или телата биле однесени таму.
Случајот се води како семејно насилство.
Таткото, Германец по националност, бил пријавен како жител на областа Адехе на Тенерифе. Канарските Острови се многу популарни за туристите од Германија и Велика Британија.
Според весникот El País, мајката наводно пристигнала со двете деца на Тенерифе во понеделникот, во посета на сопругот.
Истрагата е во тек.
