Британската премиерка Тереза Меј, вчера објави дека ќе стави крај на праксата преку која угостителите им земаат дел од бакшишот на персоналот, пренесува „BBC“.
Меј изјави дека со новиот закон ќе може да се регулира тоа за персоналот, во некои од најпознатите угостителски синџири во Велика Британија, да може да си го задржи целиот бакшиш за себе, кој го добива од муштериите.
Земањето на дел од бакшишот трае веќе подолго време
Праксата на угостителите за земање на бакшишот од келнерите и останатиот персонал не е нешто ново. Најавата за новиот закон доаѓа три години откако владата вети дека ќе стави крај на праксата на некои угостители.
Некои земаат по 8, а некои дури по 10 отсто од бакшишот
Во Велика Британија има околу 150.000 хотели, пабови и ресторани кои вработуваат околу 2 милиони луѓе. Синџирите како Belga, Giraffre, Prezza и Strade во јавноста веќе некое време се критизирани поради тоа што сопствениците им земаат по 10 отсто од бакшишот кој го добиваат келнерите, додека во некои други синџири за брза храна сопствениците земаат и по 8 отсто од бакшишот на персоналот.
Сега, со новиот закон, се очекува конечно да се постави регулатива и за овој сектор.