Тринаесет лица се повредени во тешка сообраќајна несреќа која се случи синоќа во близина на штипското село Лакавица, во која учествувале две возила, од кои во едното се превезувале мигранти.
Портпаролот на СВР Штип Гордана Панајотова потврдува дека во несреќата учествувале две возила, меѓутоа повеќе детали како се случила не можеше да даде, бидејќи во моментот на давање на изјавата во тек беше увидот од страна на истражните органи.
Директорот на Клиничка болница Штип Ален Георгиев за МИА вели дека во болницата се хоспитализирани 13 лица, од кои 11 се мигранти и двајца се македонски државјани.
Според она што му е презентирано од страна на дежурните лекари, прв впечаток е дека ниту еден од повредените не е во животозагрозувачка состојба, но во тек се прегледите и снимањето со цел да им се утврдат повредите.
Првично станува збор за мигранти од Пакистан, а мигрантите кои се во моментов во болницата во Штип ќе бидат примени на две одделенија, на ортопедија и на хирургија. Георгиев вели дека во текот на ноќта мигрантите ќе бидат и тестирани за COVID-19.
Повеќе детали околу несреќата се очекуваат во текот на денешниот ден.
