Кошаркарот на Јута Џез, Тејлор Хендрикс (21) беше изнесен од арената на носилки за време на гостувањето на неговиот тим кај Маверикс во Далас, откако во третата четвртина од натпреварот ја скрши фибулата на десната нога додека трчаше кон кошот. Има и дислокација на скочниот зглоб.
Младиот кошаркар на Џез во моментот на повредата не бил во контакт со никого. Хендрикс, деветтиот пик на минатогодишниот драфт, ја игра втората сезона во НБА. Првата сезона ја заврши со просечни 7,3 кошеви и 4,6 скока за 21 минута на 40 натпревари.
Повредата со која се здоби Хендрикс ги шокираше играчите и публиката во арената на Далас. Многумина се држеа за главите, гледајќи со неверување што му се случило. Тој беше изнесен од салата на носилки под аплауз на публиката. Далас победи со 110:102.
