Компанијата за електрични автомобили на Илон Маск продаде 75% од своите биткоин акции.
Tesla ликвидираше приближно три четвртини од своите биткоини, додавајќи 936 милиони долари во готовина во билансот на состојба, според најновиот извештај за заработка на компанијата објавен во средата.
„Од крајот на вториот квартал конвертиравме приближно 75% од нашите биткоини во декретни пари“, откри компанијата во својот финансиски извештај.
Распродажбата „не треба да се смета како пресуда за биткоинот“, нагласи извршниот директор Илон Маск за време на разговорот со инвеститорите на Tesla во средата. Тој објасни дека овој потег е потребен за да се максимизира позицијата на готовина и да се зголеми ликвидноста во услови на „неизвесност поради ковид локдаунот во Кина“ во тоа време.
Tesla инвестираше вкупни 1,5 милијарди долари во биткоин во првиот квартал од 2021 година, според претходните поднесоци, со што стана вториот најголем носител на криптовалути во корпоративниот свет, според аналитичката компанија CoinGecko. Компанијата дури објави дека ќе го прифати биткоинот како плаќање за своите автомобили, но Маск ненадејно ја смени одлуката два месеца подоцна, наведувајќи ги еколошките грижи.
„Ние не продадовме ниту еден од нашите доџкоин“, ги увери Маск инвеститорите, додавајќи дека и покрај тоа што се проценува удар од 106 милиони долари при ликвидацијата, Tesla останува отворена за зголемување на поседувањето криптовалути во иднина.
Севкупно, компанијата од Остин, Тексас, објави подобра од очекуваната нето добивка од 2,26 милијарди долари за кварталот, при што нејзините акции се зголемија за 1,5% до 753,40 долари во продолженото тргување во средата.
Во исто време, биткоинот падна на речиси 23.000 долари поради вестите од Tesla, но донекаде се врати по објаснувањата на Маск. Одлуките и изјавите на милијардерот имаа влијание врз вредноста на биткоин, доџкоин и другите криптовалути во многу прилики во минатото, при што некои крипто-инвеститори го обвинуваа дека со неговите пораки на Twitter манипулира со крипто-пазарот.
