Компанијата Tesla Motors го одложи пристигнувањето на електричниот камион Tesla Semi за наредната година.
Станува збор за ново одложување на споменатото возило, првично беше планирано да се појави на пазарот во 2019 година, а потоа беше одложено за 2021 година. Ова сега е ново одложување за следната година.
Од компанијата известија дека до одложување дошло поради ограничена достапност на батерии и проблеми при набавувањето.
„Веруваме дека се држиме до распоредот кога станува збор за производство на првите примероци на Model Y во Берлин и во Остин оваа година. Влијание на производството ќе има успешноста на воведување нови производи и технологии на производство, предизвиците во синџирот на набавување и регионалните дозволи. За да се фокусираме на тие фабрики, но и поради ограничената достапност на батерии и предизвици при набавувањето, го одложивме пристигнувањето на Semi камионот за 2022 година. Исто така, правиме напредок во индустријализацијата на Cybertruck, чие производство се планира во Остин“, се наведува во соопштението.
Компанијата Tesla првпат го најави Semi камионот во 2017 година како електричен камион со технологии кои вклучуваат и автопилот.
