Вселенскиот телескоп TESS на НАСА пронајде егзопланета помала од Земјата за 20 проценти.
TESS (Transiting Exoplanet Survey Satellite) продолжува да открива мали планети надвор од Сончевиот систем. Најново откритие е планета со ознака L 98-59b, која е за 20 проценти помала од Земјата.
Планетата се наоѓа на оддалеченост од 34,6 светлосни години. Таа не е единствената, пронајдени се уште две планети, L 98-59c и L 98-59d. За жал, ниту една од овие три нови егзопланети не се во населива зона. Поради нивната близина астрономите сметаат дека веројатно се повеќе како Венера отколку како Земјата.
Иако ова е најмалата егзопланета откриена од TESS, не е апсолутно најмалата што НАСА ја има пронајдено досега. Вселенскиот телескоп Kepler ја откри планетата Kepler-37b, која е малку поголема од Месечината. Но, НАСА е задоволна што TESS се покажа способен за откривање на вакви мали светови и научниците веруваат дека во иднина ќе има повеќе вакви откритија.
Истражувањето е објавено во The Astronomical Journal.