Тестовите на црниот дроб се збир на крвни анализи со кои се следи функцијата на црниот дроб и се откриваат неговите болести и оштетувања.
Овие тестови ги мерат нивоата на разни ензими, протеини и супстанции во крвта кои црниот дроб ги произведува или обработува. На нив упатува лекарот кога ќе се појават одредени симптоми.
Овие тестови се збир на крвни анализи кои се користат за проценка на функцијата на црниот дроб и откривање на неговите евентуални оштетувања или пак болести.
Се препорачуваат да се направат во случај на појава на симптоми или состојби кои би можеле да укажуваат на проблеми со црниот дроб.
Тестовите се прават од примерок на извадена крв, а пред самото вадење крв, отприлика 10 до 12 часа, не смее да се јаде ниту пие ништо освен лековите кои ги земате редовно.
Најчести симптоми поради кои се прават тестови на црниот дроб се:
- жолтило на кожата и белките на очите
- болка во горниот десен дел на абдоменот
- темна урина и/или светла столица
- надуеност и тврд стомак
- лесна појава на модринки
- зголемен црн дроб
- честа слабост и мачнина
- чешање
- отекување на нозете и глуждовите
Овие тестови затоа се користат за откривање на инфекции на црниот дроб како, на пример, хепатитис. Со нив може да се откријат и оштетувања на црниот дроб како цироза, а служат и за надзор на процесот на лекување на болести кои влијаат на црниот дроб.
Освен тоа, се спроведуваат и за надзор на можното влијание на некои лекови врз црниот дроб.
Како што е веќе наведено, тестовите на црниот дроб обединуваат мноштво анализи поврзани со функцијата на црниот дроб, а некои од вообичаените тестови се оние кои мерат:
Аланин трансаминаза (ALT/SGPT)
ALT е ензим присутен во црниот дроб кој помага во претворањето на протеините во енергија потребна за работа на црнодробните клетки. Кога црниот дроб е оштетен, ALT се ослободува во крвотокот што го зголемува неговото ниво.
Аспартат трансаминаза (AST/SGOT)
AST е ензим кој му помага на телото да ги разградува аминокиселините. Зголеменото ниво на AST може да укажува на оштетување и болести на црниот дроб и оштетување на мускулите.
Алкална фосфатаза (ALP)
ALP е ензим присутен во црниот дроб и коските и е многу важен во разградувањето на протеините. Покачените нивоа на ALP може да укажуваат на оштетување на црниот дроб, затнат жолчен канал или дури и болести на коските бидејќи овој ензим се наоѓа и во коските.
Албумин и вкупни протеини
Еден од неколкуте протеини кои ги произведува црниот дроб е и албуминот, а овие протеини му се потребни на телото за да се бори против инфекции и за други функции. Ако нивоата на албумин и други протеини се пониски од вообичаените, тоа може да укажува на оштетување или болести на црниот дроб, но и на гастроинтестинални и бубрежни состојби.
Билирубин
Билирубинот е супстанција која настанува за време на разградувањето на црвените крвни клетки. Поминува низ црниот дроб и се излачува со столицата. Покачените нивоа на билирубин може да укажат на болести и оштетувања на црниот дроб.
Гама глутамат транспептидаза (GGT)
GGT е ензим присутен во крвта, а покачените нивоа, меѓу другото, може да укажуваат на оштетување на црниот дроб или жолчните канали.
Протромбинско време (PT)
PT е времето кое е потребно за да се згрутчи крвта, а продолженото PT време, освен ако не земате лекови за разредување на крвта, може да укажува на оштетување на црниот дроб.
