Италијански Tuttosport објави дека тестирањата во Јувентус покажале дека Кристијано Роналдо станал уште посилен во споредба со состојбата во март кога уште се играше фудбал во Италија и во Европа пред да биде прекинат поради пандемијата.
Тестовите за сила во теретана покажале напредок кај 35-годишниот Португалец бидејќи тој ја помина изолацијата во Мадеира неуморно работејќи на себе.
Италијанците пишуваат дека напаѓачот на Јуве ја подобрил стартната брзина и ја зголемил издржливоста.
Тренерот на „Старата дама“ Маурицио Сари е многу задоволен од физичката состојба на Португалецот и смета дека ова е „најдобриот Роналдо што го видел досега“.
Фудбалерот исто така го помина периодот на изолација работејќи и од психолошки аспект, обидувајќи се да најде нови техники за зајакнување на концентрацијата.
Роналдо е силно мотивиран на тренинзите и останува да вежба и прекувремено, што го потврди со објава на Instagram – видео во кое се гледа како тренира шутирања со третиот голман на Јуве Карло Пинсољо.
