Само актуелниот куп победник оствари позитивен резултат во европските натпреварувања кои започнаа неделава, и тоа со маестрален пресврт.
Во средата, Струга загуби со 4:2 од словачкиот шампион Слован во Братислава во 1. квалификациско коло од Лигата на шампионите. Македонскиот шампион пружи достоен отпор кон посилниот противник во чиј состав беа и играчи што играа на ЕУРО 2024, како Гурам Кашиа (капитен на Грузија) и Словаците Јурај Куцка и Давид Стрелец, но и поранешните словачки репрезентативци и сега ветерани Владимир Вајс и Роберт Мак.
Струга губеше 2:0 на полувреме токму со головите на Вајс и Мак, но во вториот дел Бесарт Ибраими со два гола израмни на 2:2. Сепак, Слован во последните пет минути дојде до победа од два разлика откако Куцка прво се погрижи за 3:2 по лошата проценка на голманот Филип Дујмовиќ, а во надполнувањето ги постави конечните 4:2.
Шкендија гостуваше во Ерменија кај тимот на Ноа. Тетовчани одолеваа речиси до самиот крај кога во 81. минута Португалецот Гонсалу Грегориу го скрши мразот. Во последната минута на 2:0 зголеми Србинот Александар Миљковиќ.
И Струга и Шкендија ќе имаат ѓаволски тешка задача да надоместат негатива од два гола во реваншите на домашен терен. Не е невозможно, но ќе биде многу тешко.
Затоа, пак, Тиквеш синоќа приреди спектакл среде Скопје, на истиот стадион на кој ја освои својата прва куп титула, поради што и за прв пат во својата долга историја се избори за настап во Европа. Тиквеш го пречека реномираниот Исландски тим Бреидаблик, кој е во натпреварувачки ритам оти сезоната во Исланд е во тек.
Откако кавадарчани не искористија две добри шанси на почетокот преку Ѓорѓиев и Стојкоски, Исланѓаните немилосрдно казнуваа. Во 13. минута Исак Торвалдсон одлично го пронајде Виктор Еинарсон во домашниот шестнаесетникот, одбраната заборави на него и Исланѓанецот без мака го совлада младиот голман Стефан Тасев. Потоа одлична шанса за Тиквеш промаши и Спахиу, па казната повторно стигна. Во 31. минута Кристофер Кристинскон од речиси затворен агол ја искористи лошата поставеност на младиот домашен голман и зголеми на 2:0.
Тренерот Ѓорѓи Мојсов направи три измени на полувремето, а на трибините конечно на паузата се појави и навивачката група Лозари. Се чини дека освежувањата во составот и навивањето на Лозари го понесе Тиквеш, иако на головите се чекаше до последните 15-ина минути. Се играше 74. минута кога Едиз Спахиу одлично го проигра Кристијан Стојкоски, а овој мајсторски ја копна топката преку голманот Антон Еинарсон.
Пет минути подоцна Александер Сигурдарсон го собори нововлезениот Бразилец Витау и Тиквеш доби слободен удар на околу 25 метри. Мартин Стојанов перфектно го изведе израмнувајќи на 2:2.
Кавадарчани го искористија моментумот за да направат неверојатен комплетен пресврт. Само три минути подоцна вториот нововлезен Бразилец, Леу Гера, доби топка лево и одлично по земја погоди на подалечната статива за водство од 3:2. Исланѓаните немаа сили да се вратат и Тиквеш запиша историска прва европска победа.
Тиквеш на реваншот наредниот четврток во градот Копавогур има право да се надева на позитивен резултат и минување во 2. квалификациско коло, каде би играл со косовскиот клуб Дрита.
