Интер Мајами се уверени дека Лионел Меси ќе потпише за нив по Светското првенство во Катар, објави The Times.
Британците тврдат дека Интер Мајами, клубот во сопственост на поранешниот англиски играч Дејвид Бекам, очекува Меси да му се приклучи на тимот на крајот од европската сезона.
Меси, кој во моментов е играч на француски ПСЖ, доколку ја прифати понудата на Мајами, ќе стане најплатениот фудбалер во историјата на МЛС. Според истиот извор, Мајами сака да ги доведе поранешните соиграчи на Меси, Цеск Фабрегас и Луис Суарес.
Неодамна The Athletic објави дека Меси со месеци тајно преговара со Интер Мајами. Со Интер се поврзуваше и најголемиот ривал на Меси, Кристијано Роналдо, кој сака да го напушти Манчестер Јунајтед. Најголемо име во клубот на Бекам досега беше сонародникот на Меси, Гонсало Игуаин, кој неодамна објави крај на кариерата, а најголеми ѕвезди во клубот се францускиот играч за врска Блез Матуиди и поранешниот англиски репрезентативец Киран Гибс.
35-годишниот Аргентинец и според многумина најдобар фудбалер на сите времиња, пред две години ја напушти Барселона и како слободен играч пристигна во ПСЖ. За парискиот клуб оваа сезона постигна 14 гола со 17 асистенции.
