Популарната пејачка Тина Тарнер откри дека се обидела да си го одземе животот поради тоа што во еден момент се почувствувала беспомошно во бракот со Ајк Тарнер, кој постојано ја малтретирал.
Таа вели дека со голема тага се сеќава на тој период од нејзиниот живот, кога постојаното физичко и психичко насилство ѝ го уништувале животот до тој степен што чувствувала дека смртта е подобра опција од таквиот живот.
Новата книга напишана од Тина Тарнер, која го опишува нејзиниот живот во форма на мемоар за бракот со Ајк Тарнер. Книгата е наречена „My Love Story“ („Мојата љубовна приказна“), а во неа таа пишува дека сексот со Ајк бил „силување, на некој начин“.
„Сѐ ми дојде преку глава една вечер во 1968 година. Не можев да го поднесам таквиот живот повеќе и голтнав 50 апчиња за заспивање“, пишува Тарнер.
Таа ги испила апчињата непосредно пред настап, а почнала да ги чувствува ефектите кога се шминкала пред да излезе на сцената. Набрзо потоа била однесена во болница, каде докторите ѝ го прочистиле стомакот и ја пуштиле на домашно лекување, па набрзо потоа таа им се вратила на настапите.
„Тој (Ајк) го користеше мојот нос како боксерска вреќа толку многу пати што често можев да почувствувам крв како тече низ моето грло додека пеев. Првиот пат кога ме удри бев бремена. Ми ја скрши вилицата и ме малтретираше, а скоро и да не се сеќавам на ден без да имам модринка на окото“, пишува Тина Тарнер во нејзината автобиографија.
Ајк и Тина Тарнер се запознаа кога таа имаше 17, а тој 25 години. Неговото насилство е документирано низ медиумите кои во тоа време ја сметаа оваа двојка за една од најпопуларните во светот, но никој не презема чекор повеќе за да ја оттргне Тина од лошото влијание на насилниот Ајк.
„Мојот обид за самоубиство не беше класичен повик за помош. Јас одбрав да умрам, бидејќи не сакав да живеам таков живот“, пишува таа.
Автобиографијата „My Love Story“ ќе биде објавена на 18 декември, а како издавач се потпишува британскиот Daily Mail.