Тинејџерот кој успеа да го надмудри киднаперот на школски автобус во Италија и ги спаси неговите соученици, ќе добие италијанско државјанство, сооопшти италијанското Министерство за внатрешни работи.
Возачот на школскиот автобус во северна Италија завчера го грабна возилото полно со ученици и го запали, но за среќа сите деца беа спасени и поминаа без потешки повреди.
За ваквиот среќен крај за 51 дете придонесе 13-годишниот Рами Шехат кој одлично се снајде во страшната ситуација.
Тој успеал да го скрие телефонот и да му се јави на татко му, иако киднаперот им ги собрал мобилните телефони на децата. Тој се преправал дека се моли на арапски, а всушност му кажувал на татко му дека се кдинапирани.
Возачот, 47-годишен Италијанец со сенегалско потекло, го грабна автобусот, се закани дека ќе се самоубие, а потоа го запали.
За среќа, децата беа спасени преку скршените стакла на задната страна на автобусот, откако полицијата го опколи напаѓачот.
Родителите на момчето се по потекло од Египет, а Рами е роден во Италија, но досега не можел да добие италијанско државјанство.
„Мојот син ја обави својата должност, би било добро сега да добие италијанско државјанство. Би сакале да останеме во оваа земја“, рече таткото на Рами откако киднаперот беше уапсен.
