Наредната сезона ќе почне инаугуралната сезона во УЕФА Европа конференциската лига, новото клупско натпреварување кое ќе заврши со големото финале во Тирана.
Денеска европската куќа на фудбалот одлучи домаќинлукот на првото финале од новото натпреварување да ѝ го додели на Албанија и нејзиниот главен град Тирана.
Се работи за трето по ранг натпреварување кое УЕФА го воведува за да ги задоволи помалите земји кои ретко имаат претставник во Лигата на шампиони и Лига Европа. Ќе продефилираат вкупно 184 клубови од сите 55 земји-членки на УЕФА, а 46 ќе се приклучат по елиминација од останатите две натпреварувања.
Форматот ќе биде како и во Лигата на шампиони: по квалификациите (кои ќе почнат на 8 јули) ќе се формираат 8 групи, секоја со по 4 клубови, а потоа преку нокаут-систем ќе се стигне до финалето.
А, тоа финале ќе се игра на 25 мај 2022 година на „Ер Албениа“ стадионот во Тирана, односно „Арена Комбтаре“ како што го именува УЕФА каде е забранета употребата на имиња на спонзори кај стадионите.
Стадионот е мал, има капацитет од само 22.500 гледачи, но е тотално нов, пуштен во употреба на 17 ноември минатата година. На стадионот игра репрезентацијата на Албанија, а по потреба го користат и градските ривали Тирана и Партизани. Изграден е на местото на „Ќемал Стафа“ стадионот кој се користеше од 1946 до 2016.
