Оваа година, по шести пат, Здружението на џез музичари и слободни уметници - ЗЏМ Скопје, ќе го одржи настанот насловен Today It’s All About Jazz vol.6. Манифестацијата ќе се одржи на 30 април – Меѓународниот ден на џезот, во паркот „Ибни Пајко,“ со почеток од 14 часот.
На настанот кој ќе трае до доцните вечерни часови ќе настапат седум македонски џез состави, составени од џез музичари добро познати на публиката. Во текот на целодневниот хепенинг ќе може да се проследат настапите на:
Џоле Грујовски - Resonance
Џон Илија Апелгрен & Гордан Спасовски
SS Project
Off Ground Ensemble
Сашо Поповски
CuckooRack aka Bopers
Тони Китановски.
Со овој настан нашата земја се вбројува во 180те земји од светот кои го одбележуваат Меѓународниот ден на џезот. Во ноември 2011 година УНЕСКО официјално го одреди 30 април за Меѓународен ден на џезот, со цел да се истакне џезот и неговата дипломатска улога да ги обединува луѓето од сите страни на светот. Овој настан глобално е предводен од генералниот директор на УНЕСКО, Одри Азулеј, и легендарниот џез-пијанист и композитор Херби Хенкок, кој е и амбасадор на УНЕСКО за меѓукултурен дијалог и претседател на Институтот за џез Херби Хенкок.
„Музиката има моќ да нè обедини сите и по повод Меѓународниот ден на џезот, да се собереме и заедно да уживаме во џезот славејќи ги неговите принципи и слободата на изразување“, порачаа од ЗЏМ.