Товарен авион се урна во станбена зона во Литванија

Рано утринава товарен авион се урна во близина на аеродромот во Вилнус, во областа Липкалнис, јавија литванските медиуми. Според официјалните информации, пилотот – кој се освестил – бил извлечен од урнатините и предаден на медицинскиот персонал.

Претставник на Одделот за противпожарна заштита и спасување за LRT изјави дека најмалку едно лице загинало, а неколку се повредени.

Товарниот авион Boeing 737 на компанијата DHL летал од Лајпциг, а се вели дека паднал и удрил во двокатница. Ова за LRT го потврдија претставници на аеродромот. Спасувачките служби излегоа на местото на настанот. Претставникот на аеродромот, Мариус Зелениус, за LRT изјави дека на местото на несреќата работат голем број спасувачки екипи. Според него, авионот од Лајпциг се урнал околу 5:28 часот по литванско време во Липкалнис.

Безбедносните камери го снимија моментот кога авион се урнал. Снимките што кружат на социјалните мрежи покажуваат како авионот се подготвува за слетување. На небото се гледаат светлата на авионот додека полека ја спушта висината. И тогаш, во еден момент, доаѓа до страшна експлозија и блесок што го осветлува небото.

Еден член на екипажот загина при падот, а другите тројца со повреди беа извлечени од леталото и беа пренесени во болница. Авионот се излизгал неколку стотици метри пред да удри во станбена зграда.

Според официјални лица, 12 лица, кои биле во објектот во моментот на ударот, биле извлечени живи.

Причината за падот на авионот сè уште не е позната, а истрагата е во тек. Многубројни теории кружат за тоа што му претходело на падот, а според надлежните, не е исклучена ниту можноста од терористички напад.

„Еден од членовите на екипажот е пронајден без знаци на живот“, изјави Вилмантас Виткаускас, шеф на Државниот кризен центар. Виткаускас рече дека е прерано да се извлечат какви било заклучоци за тоа што ја предизвикало несреќата и дека околностите и причините се истражуваат.

Во овој момент нема индикации дека на авионската несреќа ѝ претходела експлозија во леталото. Се верува дека авионот паднал поради технички дефект или човечка грешка. Но, не е исклучена ниту опцијата дека се работи за терористички чин, пишуваат локалните медиуми.

„Ова е една од верзиите за несреќата, која ќе биде истражена и проверена. Пред нас е многу работа. Собирањето докази може да потрае цела недела, нема да има брзи одговори“, рече Паулаускас.