Toyota и Tesla веќе нема да се обидуваат да ја спасат врската.
Јапонскиот автопроизводител завчера соопшти дека го продал последниот пакет акции во Tesla и дека се подготвува да произведува свој електричен автомобил.
Наводно, меѓу Toyota и компанијата на Елон Маск дошло до „судир на културни разлики“: конзервативниот јапонски пристап „безбедноста на прво место“ не се вклопувал со методот на преземање ризици на Tesla.
Toyota откупи 3 % од акциите на Tesla за 50 милиони долари во 2010 година.
Јапонската компанија тогаш рече дека била импресионирана од „стартап културата на Tesla“, како и од главниот извршен директор Елон Маск, и рече дека партнерството е „историски потег“.
Двете компании заедно го направија електричното возило RAV4 и од овој модел беа продадени 2.500 примероци.
Меѓутоа, јазот меѓу двете компании се покажа преголем за да може да се премости.
Во 2014 година, Toyota продаде дел од својот влог во Tesla.
Јапонската компанија основа свој погон за производство на електрични автомобили во ноември, 2016 година и солидно инвестираше во водородно напојување, технологија за која Маск рече дека е „неверојатно глупава“.
Се очекува првите електрични возила на Toyota да бидат подготвени за пазарот во 2020 година.