Почина Викторија Ли (18), членка на најголемата азиска ММА промоција ONE Championship, а оваа вест ја потврди нејзината сестра и една од најголемите женски боречки ѕвезди во светот, Анџела Ли.
Викторија требаше да се бори на 14 јануари на првиот ОНЕ настан годинава, а Анџела на Instagram напиша дека Викторија починала уште на 26 декември минатата година.
Сепак, семејството досега не сакаше да ја објави оваа вест во јавноста, а истовремено не е наведена и причината за смртта на оваа исклучително талентирана млада спортистка.
„Таа прерано замина и нашето семејство од тој момент е целосно уништено. Ни недостига, повеќе од сѐ на светот. И нашето семејство никогаш нема да биде исто“, е дел од она што го напиша Анџела.
Викторија тренираше и живееше на Хаваи каде семејството Ли се преселило од Канада уште пред таа да се роди.
Беше во тимот со Анџела, а главен тренер им беше сопругот на Анџела, Бруно Пучи.
Инаку, Викторија се истакна во помладите категории, а прилика да дебитира професионално доби на само 16 години.
Сите три претходни ММА борби во организација на ONE Championship успешно ги одработи.
