Американскиот и рускиот претседател денес имаат историска средба во Хелсинки.
Рускиот претседател Владимир Путин пристигна на самитот во финската претседателска резиденција со доцнење од еден час, а на закажаната прес-конференција тензијата беше опиплива, иако американскиот лидер Доналд Трамп со пофални зборови му се обрати на рускиот колега.
Односите меѓу двете земји никогаш не биле понапнати, призна Трамп, а Путин рече дека се согласува.
Откако Путин се изјасни дека му е задоволство што се сретнува пак со Трамп, Американецот побрза да му честита за одличната организација на Светското првенство и рече:
„Гледав малку... одлично организирано.“
Трамп рече дека имаат многу теми на разговор, од трговија до Кина „и нашиот заеднички пријател Сји“.
„Имаме одлични можности заедно, со години не се согласувавме. Но добро е да се согласуваме. Светот сака да се согласуваме. Меѓу нас имаме 90% од нуклеарното наоружување во светот, а тоа не е добро“ рече Трамп.