Астрономите и вљубениците во астрономијата вчера „научија“ важна лекција од американскиот претседател Доналд Трамп – Месечината да ти била дел од Марс.
За жал, ова не е лажна вест, како што Трамп обожава да кажува. Претседателот на САД е познат по неговите контроверзни и просто нелогични изјави и твитови, но со вчерашниот твит дефинитивно се надмина.
Во обид да укаже дека нова мисија на Месечината би била непотребен трошок за САД, Трамп во еден здив успеа да го просветли целиот свет за тоа каде се наоѓаат небесните тела.
„За сите пари што ги трошиме, НАСА не би требало да оди на Месечината – Тоа го направивме пред 50 години. Треба да се фокусираат на поголемите работи што ги правиме, како Марс (од кого Месечината е дел), Одбрана и Наука!“, гласи твитот на Трамп.
Ваквата изјава на Трамп шокираше многу астрономски ентузијасти, бидејќи традиционално, не се смета дека Месечината е дел од Марс.
Водечката теорија е дека при судир на Земјата со вселенски објект со големина на планета пред многу, многу години, настанале остатоци од кои подоцна се формирала Месечината и станала природен сателит на нашата планета. Оддалеченоста на Марс од Месечина во просек изнесува 140 милиони милји.
НАСА не одговори на прашањата на The Guardian дали Месечината е дел од Марс.
Без разлика на „експертизата“ на Трамп за небесните тела, она што е фактички изненадување е сознанието дека претходно беше полн со ентузијазам за повторното одење на Месечината - на 13 мај годинава Трамп твитна: „Се враќаме на Месечината“.