Американскиот претседател Доналд Трамп ги коментираше царините на почетокот на средбата со ирскиот премиер Мајкл Мартин во Овалната соба, велејќи дека САД ќе одговорат на контрамерките на Европската Унија кои беа воведени денеска.
Тој рече дека во моментов има одредена флексибилност околу тарифите, но дека тоа ќе престане кога ќе стапат на сила мерките.
„Дефицитот е сè уште огромен“, рече Трамп, додавајќи дека САД ќе преземат чекори за да го затворат.
Тој, исто така, ја издвои Ирска, обвинувајќи ја дека ја користи нејзината даночна политика за да привлече фармацевтски и други компании од САД.
„Имаме огромен дефицит со Ирска и другите земји и сакаме да го избалансираме тоа на најдобар можен начин. Ќе работиме заедно“, рече Трамп заедно со ирскиот премиер.
Но, тој повтори дека САД ќе воведат реципрочни царини за да помогнат во обновувањето на американското производство.
„Европската унија е основана за да ги искористува САД“, рече Трамп.
„Имаме проблем со Европската Унија. Тие не ги купуваат нашите земјоделски производи, автомобили. Ние купуваме милиони европски автомобили. Не сум задоволен од Европската Унија и ќе ја добиеме таа финансиска битка“, рече Трамп.
На прашањето дали размислува да воведе царини за европските автомобили, тој рече: „Апсолутно ќе го сторам тоа“.
„Нема да биде тешка битка (со ЕУ). Исто како што Онтарио ни постави тарифи. Сите рекоа ‘Воведоа царини’, јас реков дека ќе потрае еден час. Соопштија што ќе прават, а потоа ја повлекоа својата мала закана. Во Канада велат дека имаат царини од 270% за млечните производи, до 400%. Канада е една од најлошите за царини“, изјави Трамп.
Тој исто така рече дека Ирска ги користи САД и дека САД никогаш не требало да го дозволат тоа. „Имавме глупави лидери, лидери кои немаа поим.“
Трамп тогаш конкретно го критикуваше заминувањето на американските фармацевтски компании во Ирска:
„Одеднаш Ирска ги има нашите фармацевтски компании, овој прекрасен остров со пет милиони луѓе ја држи целата американска фармацевтска индустрија во свои раце.“
Трамп исто така рече: „САД се експлоатирани, но нема повторно да бидат експлоатирани“.
