Американскиот претседател Доналд Трамп се обиде да објасни што мислел кога за имигрантите во Калифорнија рече дека „тоа не се луѓе, туку животни кои треба да се протераат“.
По кој знае кој пат американскиот претседател со своја изјава предизвика лавина на коментари во јавноста, па дополнително мораше да објаснува што всушност сакаше да каже.
Имено, Трамп ги нарече „животни“ илегалните имигранти во државата Калифорнија.
„Тоа не се луѓе, тоа се животни. Ги протеруваме од земјата со брзина која порано никогаш не сме ја имале“, изјави американскиот претседател и додаде дека калифорнискиот закон нуди засолниште за ваквите „опасни престапници, кои се едни од најнасилните во светот, како што се членовите на групата MS-13“, станува збор за криминална банда од Салвадор.
Неговата изјава предизвика жестока реакција меѓу демократите, кои рекоа дека имигрантите се живи суштества.
„Не се животни, ниту криминалци, ниту шверцери на дрога, ниту силувачи. Тие се живи суштества“, изјави демократскиот пратеник Џаред Полис од американската сојузна држава Колорадо.
Трамп, после овие реакции се обиде да се извади, па образложи дека под терминот „животни“ мислел на имигрантите, кои се припадници на криминални банди и кои нелегално влегуваат во САД, а не и на другите имигранти.