Американскиот магазин Time секоја година одржува избор за Личност на годината – признание кое го добива највлијателната личност во светот за изминатата година. Оваа година конкуренцијата е проширена на повеќе од само популарни личности и светски лидери.
Покрај вообичаените имиња како Доналд Трамп и Владимир Путин, магазинот Time оваа година за Личност на годината ги номинираше и новинарот Џамал Кашоги, како и режисерот на филмскиот хит „Black Panther“, Рајан Куглер.
Всушност, наградата за Личност на годината е наменета за онаа личност која најмногу влијаела на светските вести во текот на изминатите 365 дена. Поради тоа, воопшто не е изненадувачки што на листата со номинации се најдоа и разделените семејства на американската граница и средношколците кои маршираа за нивните животи по масовните убиства во училиштето Марџори Стоунмен.
Помеѓу номинираните се најде и Кристин Бласи Форд, која го обвини судијата Брет Кавано за сексуален напад, бидејќи во текот на средината на 2018 година неговото судење беше во фокусот на сите големи медиумиски куќи во светот. Место на листата најдоа и Мун Џае-ин – претседателот на Јужна Кореја, Меган Маркл – актерката која стана дел од британското кралско семејство откако се омажи за принцот Хари, како и американскиот специјален советник Роберт Мјулер, кој ја продолжи истрагата околу руското мешање во изборите во САД.
Целосната листа можете да ја погледнете ТУКА. Конечниот победник и добитник на признанието Личност на годината ќе биде објавен веќе утре (12.12.2018), во магазинот Time.