Американскиот претседател Доналд Трамп изјави во четвртокот дека САД наскоро ќе го потпишат договорот за минерали и природни ресурси со Украина и дека неговите напори да постигне мировен договор за земјата одат „прилично добро“.
Трамп ја даде изјавата во Белата куќа по потпишувањето на извршната наредба за зголемување на производството на критични минерали во САД.
„Добро ни оди со Украина и Русија. Една од работите што ги правиме е потпишување договор со Украина за многу брзо во врска со ретките метали“, рече тој.
Трамп, исто така, се осврна на одделните разговори оваа недела со рускиот претседател Владимир Путин и украинскиот претседател Володимир Зеленски, со цел да се стави крај на руската војна во Украина.
„Би сакале да ја видиме таа војна завршена и мислам дека работиме прилично добро во тој поглед. Се надеваме дека ќе спасиме илјадници луѓе неделно од смрт. Тие умираат толку непотребно и верувам дека ќе го направиме тоа“, рече Трамп.
Како што потсетува Reuters, Украина и САД овој месец соопштија дека се договориле што е можно поскоро да склучат сеопфатен договор за развој на критичните минерални ресурси на Украина, што Трамп го гледа како начин земјата да им исплати на САД за помошта.
Во моментов не е јасно дали и какви промени се направени во овој договор, имајќи предвид дека претходната верзија не ги вклучуваше експлицитните безбедносни гаранции што Украина ги бараше.
На прашањето како сегашната верзија на договорот за минерали се разликува од претходниот нацрт, висок американски функционер рече дека тој е „подетален и сеопфатен“, одбивајќи да даде дополнителни појаснувања, додека украинската амбасада во Вашингтон не одговори веднаш на барањето на Reuters за коментар.
Кога станува збор за извршната наредба за зголемување на американското производство на клучни минерали, таа исто така има за цел да ја неутрализира контролата на Кина во таа област, имајќи предвид дека таа е најголемиот светски производител или преработувач на многу критични минерали.
Во производството на електроника се користат литиум, бакар, никел и други минерали, а побарувачката за производство на батерии за електрични возила се очекува да се зголеми во наредните години. Американскиот рударски сектор долго време бара донесување на ваква извршна наредба, при што многумина се жалат дека бирократските одложувања го попречуваат производството во земјата, наведува Reuters.
Имено, регулативата, меѓу другото, ги насочува федералните агенции да креираат листа на американски проекти за рударство кои можат брзо да бидат одобрени.
