Американскиот претседател Доналд Трамп во Сеул денес изјави дека Соединетите Американски Држави се подготвени да употребат цел спектар на воени сили за да спречат напад на Северна Кореја, но додаде и дека е фокусиран на користење на „сите достапни средства освен воени акции“, за да спречи конфликт.
„Северна Кореја е глобална закана која бара глобална акција“, истакна Трамп на заедничката конференција за новинари после состанокот со јужнокорејскиот претседател.
Меѓутоа, тој со помалку агресивен тон ја повика Северна Кореја да ја направи „вистинската работа“, велејќи дека забележал одредени промени, иако одбил подетално да ги објасни.
„Навистина има смисла севернокорејците да дојдат на маса и да се договорат“, изјави Трамп за новинарите.
Од канцеларијата на јужнокорејскиот претседател беше соопштено дека Трамп и тој се договориле Јужна Кореја веднаш да започне со преговори околу развојот на јужнокорејските воени капацитети, вклучувајќи и испраќање на најмодерни средства за набљудување.
Двајца функционери исто така се договориле да продолжат со заеднички напори со Јапонија за практично решавање на севернокорејските закани.