Вашингтон, 21 август 2019 (МИА) – Американскиот претседател Доналд Трамп би го поддржал враќањето на Русија во Г-7, група на индустриски најразвиените економии, која викендов оддржува годишен самит во Париз.
- Сметам дека би било многу посоодветно Русија да биде внатре, изјави тој синоќа за време на средба во Белата куќа со романскиот претседател Клаус Јоханис.
Трамп повторно ја фаворизира Русија наспроти мнението на сојузниците и воопшто не искоментира за анкесијата на Крим и војната во источна Украина. Укажа дека неговиот претходник, Барак Обама, барал Русија да излезе од групата бидејќи „бил надитрен“, од страна на рускиот претседател Владимир Путин.
- Претпоставувам бидејќи беше надитрен од Путин, Обама сметаше дека не е добро Русија да биде внатре, туку да излезе (од тогашната Г-8), изјави Трамп.
Американскиот претседател сличен исказ даде и лани, кога пред заминувањето на самитот на Г-7, изјави дека Русија треба да биде вратена во групата.
