Американскиот претседател Доналд Трамп зборуваше за ситуацијата во Појасот Газа, велејќи дека Јордан и Египет треба да примат повеќе бегалци од оваа палестинска енклава.
Трамп претходно го најави ова решение за голем број бегалци од Газа во директен разговор со јорданскиот крал Абдула.
„Му реков дека треба да прими повеќе луѓе бидејќи е катастрофа таму долу. Би сакал да прими уште бегалци“, рече Трамп.
Сето тоа им го повтори и на собраните новинари кога го напушташе претседателскиот авион, иако додаде дека истото треба да го направи и Египет.
„Таму долу сè е уништено и луѓето умираат. Ние попрво би соработувале со арапските народи, да изградиме населби и овие луѓе да живеат, за промена, во мир“, рече американскиот претседател.
Запрашан дали тоа е привремено или трајно решение, Трамп рече дека „може да биде и едното и другото“.
Пред 7 октомври 2023 година, кога започна нова ескалација на конфликтот меѓу Израел и палестинската група Хамас, во Газа живееја 2,3 милиони луѓе. Се смета дека 1,5 милиони се внатрешно раселени.
Прекинот на огнот, по една и пол година војна, стапи на сила на 19 јануари, иако прашањето за враќање на жителите на Газа во своите домови, особено на северот од територијата, не е регулирано.
