Американскиот претседателски кандидат Доналд Трамп откри нови детали од неговиот план за депортирање имигранти во оваа земја, а во него е вклучен и закон донесен во 1798 година.
Трамп својот план го нарече „Операција Аурора“, а во него е вклучен и т.н Alien Enemies Act, донесен пред дури 226 години.
Тогашната американска влада, под водство на Џон Адамс, објави збир на закони кои се занимаваа со односите на државата со лицата без државјанство во Америка.
Интересно е што овој закон се користел во 1941 година. Откако Јапонија ги нападна САД, односно базата Перл Харбор, тогаш претседателот Френклин Д. Рузвелт, повикувајќи се на овој закон, одлучи да ги таргетира граѓаните на Јапонија, Германија и Италија.
Според законот, ако не-државјанин е во САД и доаѓа од земја која се смета за непријателска, властите во Вашингтон имаат право да го затворат или депортираат без судење.
Планот на Трамп е конкретно поврзан, како што вели, со криминални групи, пред сè од Мексико и Венецуела. Тој го претстави планот во Аурора, Колорадо, велејќи дека местото го „презеде банда од Венецуела“, иако не понуди докази.
Планот е да се користи ICE, федералната агенција за имиграција, за да се идентификуваат и депортираат луѓето кои се во САД без пасош или виза.
Овде вреди да се истакне дека во моментов има неколку милиони луѓе од бројни земји од Централна и Јужна Америка кои илегално влегле во земјата, а овој процес би чинел милијарди долари.
Дополнително, експертите посочуваат дека за да го искористи законот од 1798 година, Трамп ќе мора официјално да им објави војна на земји како Венецуела и Мексико, што е нереално, имајќи предвид дека за ова му е потребна поддршка од двата дома на Конгресот.
