Американскиот претседател Доналд Трамп на настан од предизборната кампања во Северна Каролина рече дека можеби ќе биде избран за Нобелова награда за мир.
Во тој контекст Трамп го спомна неодамна потпишаната спогодба меѓу Белград и Приштина во Вашингтон.
Трамп рече дека успеал да спречи да продолжат масовните убивања што со децении се случуваат меѓу Србија и Косово.
„Сигурен сум дека ќе се квалификувам за Нобелова награда за мир. Ги спречивме масовните убивања меѓу Србија и Косово. Долги години се убиваа меѓусебе. Ќе престанат да се убиваат едни со други. Реков: ‘Момци, ајде да се собереме’. Знаете, тие го прават тоа стотици години, под различни имиња“, рече Трамп.
Претседателот на САД веќе е номиниран за Нобеловата награда за мир, токму за посредувањето за потпишување на спогодбата за нормализација на економските односи меѓу Белград и Приштина.
