Утринава Лондон беше потресен од нападот кој се случи на метро станицата „Parsons Green“, а британската Влада веќе го карактеризираше нападот како терористички акт. Американскиот претседател Доналд Трамп верува дека има решение како да се спречи тероризмот.
Доналд Трамп верува дека решението за борба против тероризмот лежи во укинувањето на интернетот. Тој во реакцијата по нападот на метрото во Лондон напиша дека интернетот е главната алатка за регрутација на терористи.
„Мора да се соочиме со терористичките губитници на многу посуров начин. Интернетот е нивна главна алатка за регрутација која мора да ја укинеме и да ја користиме подобро“, напиша Трамп на својот Twitter профил.
Во следниот твит тој нагласи и дека би сакал да ја засили забраната за патување која сака да ја наметне на САД, но дека многумина би рекле дека тоа е политички некоректно.
Ова не е првпат Трамп да бара да се забрани интернетот, претходно имаше побарано од Бил Гејтс да го „затвори“ интернетот за да се спречи неговата употреба од страна на ИСИС.