Walt Disney Studios го објави првиот тизер за филмот Snow White, играна адаптација на анимираниот класик од 1937 година, но првите реакции на гледачите не се баш најдобри.
Долгоочекуваната адаптација ја режираше Марк Веб, режисерот на филмовите 500 Days of Summer и The Amazing Spider-Man, а сценариото го напишаа Ерин Кресида Вилсон и Грета Гервиг.
Анимираниот филм „Снежана и седумте џуџиња“ е инспириран од бајката на браќата Грим. Приказната ја следи принцезата Снежана, која ќе побегне во шумата и живее со седумте џуџиња, откако нејзината маќеа ќе нареди да биде убиена.
„Снежана и седумте џуџиња“ се смета за најважниот филм на Disney бидејќи успехот на филмот ѝ помогна на компанијата да стане една од водечките креативни сили на 20 век. Тој е исто така еден од најважните филмови досега бидејќи е првиот долгометражен анимиран филм во историјата на филмот.
Иако се работи за адаптација, играниот филм Snow White ќе има малку поинаква приказна. Според Variety, ѕвездите од филмот Рејчел Зеглер и Гал Гадот потврдиле дека Снежана овој пат нема да ја спаси принцот.
Во новиот филм Зеглер ја игра Снежана, Гадот Злобната кралица, а Анса Кабија ловецот. Во актерската екипа се и Ендрју Бурнап, Дујона Гифт, Мартин Клеба и Колин Мајкл Кармајкл.
Од најавата за снимањето, Snow White е во центарот на бројни контроверзии. Фановите имаа замерки за промените во приказната, како и за тоа што џуџињата не ги играат актери со џуџест раст. Многумина беа разочарани и од веста дека Зеглер ја игра Снежана.
Новиот тизер наиде на негативни коментари и на социјалните мрежи.
„Оригиналниот филм беше најголемото достигнување на Walt Disney и еден од најважните филмови во историјата на анимацијата. Адаптацијата во живо ми изгледа сквернавење. Навистина треба да престанат да прават адаптации“, напиша еден обожавател.
„Ова изгледа толку бездушно“, додаде друг.
„Рејчел Зеглер е толку лош избор за главната улога. Таа не изгледа ниту се однесува како Снежана“, додаде трета.
„Рејчел има прекрасен глас и никој не може да ме убеди дека тоа не е вистина. Но, сè друго изгледа толку страшно", напишал еден фан.
Филмот Snow White доаѓа во кината на 21 март 2025 година.
