Жозе Мурињо дивееше од радост кога Манчестер Јунајтед за влакно се спаси од пораз и постигна решавачки гол против Јанг Бојс на вчерашниот дуел за пласман во осмина финалето на ЛШ.
Голот на Маруан Фелаини го возбуди целиот стадион, но и го разбранува фудбалскиот свет. Со оваа победа Јунајтед може опуштено да игра во Валенсија бидејќи му е обезбеден влезот во осмина финалето.
Имајќи предвид дека „лилјаците“ паднаа во Италија на гости кај Јувентус, со голот на Марио Манџукиќ, очекувано е што тренерот на Валенсија Марселино Гарсија Торал е нервозен.
„Ми рекоа дека Фелаини играл со рака за победата на Манчестер, но немаме решение за таа ситуација. Она што ме чуди е што ВАР не е воведен во најпрестижното клупско натпреварување во светот. Но, тоа е фудбалот. Сега ќе се сконцентрираме на натпревари во лигата и купот“, рече шпанскиот тренер.
„Да речам дека не ме погодува тоа што ми кажуваат дека Манчестер го постигнал победничкиот гол во продолженија, откако истото го направи и минатото коло, би бил непрофесионален. Но, кога ќе ти кажат дека во голот имало и игра со рака, тогаш се јавува и малку бес.“
За крај, ги пофали Јувентус и Кристијано Роналдо.
„Понекогаш натпреварот го решаваат детали, моменти на инспирација. Знаејќи дека во продолжението ќе имаме потешкотии, во првото полувреме ние имавме една поголема шанса. Потоа Јуве нѐ притисна и една голема акција на Роналдо резултираше со гол. Екипата даде сѐ од себе против еден од главните фаворити за освојување на титулата, па иако сум тажен бидејќи спаднавме од игра, се враќам дома горд на оваа екипа.“