Трет ден по ред стотици демонстранти се собраа пред зградата на Министерскиот совет во Софија, јави агенцијата Бгнес.
Пред зградата е распореден полициски кордон.
Според агенцијата, граѓаните скандираат „Оставка” и „Мафија” и вејат бугарски и црни знамиња.
Протестот засега е мирен.
Полицијата во Бугарија вчера уапси 18 лица по помалите судири за време на протестот против корупција во центарот на Софија, недалеку од местото каде што се собраа приврзаниците на бугарската Влада.
Демонстрантите се собраа откако, по наредба на обвинителството, беше извршена рација во канцеларијата на бугарскиот претседател Румен Радев, кој често ја критикува Владата.
Владејачката партија ГЕРБ, од чии редови доаѓа премиерот Бојко Борисов, соопшти дека Радев подгрева политичка криза која, како што истакна оваа централно-десничарска партија, „може да биде само во служба на сомнителни деловни интереси“.
– Корупцијата, рекетирањето од страна на обвинителите и непостапувањето против крадците… како и недостигот на правда, е она на што луѓето се спротивставија, рече Радев.
