Најновите податоци за состојбата со пандемијата на COVID-19 покажуваат дека досега се регистрирани 877.041 лице заразени со новиот коронавирус. Од нив починати се 43.541, а оздравеле 185.065 луѓе.
Во Франција вчера беше регистриран црн рекорд – починаа најмногу заболени од коронавирусот во еден ден, дури 499, соопштија здравствените служби.
Планирано е пациентите кои се во критична состојба од Париз да се префрлаат во полесно погодените региони.
Според податоците на порталот Worldometers, во Франција има 52.128 случаи на заболени, од кои 3.523 починале што значи дека е трета земја во Европа по број на смртни случаи од COVID-19, а четврта во светот, по Италија, Шпанија и САД. Вкупно 9.444 пациенти во Франција оздравеле.
Веќе три дена со ред бројот на заболени во Франција расте, иако властите во оваа земја три недели се обидуваат да го спречат ширењето на вирусот. За само 24 часа меѓу понеделникот и вторникот бројот на заразени се зголеми за 17%, а порасна и бројот на починати.
Загрижувачки е фактот дека засега познатата бројка на починати од COVID-19 во Франција се состои само од случаите регистрирани во болниците и се очекува да се зголеми кога ќе се додадат и починатите од болеста во пензионерските и старечките домови.
