Преварените или лепливи тестенини се кулинарска катастрофа што не може да се спаси ни со најубавиот сос. Затоа е добро да знаете неколку трикови што ќе ви помогнат во кујната.
Ретко кој не сака тестенини, а покрај тоа што се вкусен оброк со безброј варијанти за сечиј вкус, исто така се брзи за готвење и не бараат огромна кулинарска умешност. Сепак, има неколку грешки што луѓето ги прават при варењето на тестенините што може да го уништат јадењето.
Прво од основните правила за добро сварени, но не преварени тестенини е добар сооднос на вода и тестенини, како и доволно големо тенџере за да може содржината рамномерно да се свари. Добро познато правило е дека треба да ставите сол во водата пред да ги ставите тестенините и да пробате дали е доволно солена.
Второ - одбегнувајте го стариот трик со маслото. Мит е дека треба да ставите масло во водата за варење за да не се залепат тестенините на дното. Тоа само ќе придонесе да не се врзе убаво сосот со тестенините. Подобра опција е почесто да ги мешате во текот на варењето, а тоа значи и дека треба да имате доволно количество на вода во тенџерето. Без разлика на упатството за употреба, најсигурен начин за да знаете дали се готови тестенините е да ги пробате, бидејќи ако се преварат, враќање нема.
Третата најчеста грешка е измивањето на тестенините по варењето со ладна вода. Тоа е сосема непотребно бидејќи на тој начин само го отстранувате тенкиот слој скроб на површината што помага подобро да се врзат тестенините за сосот.