Поранешниот долгогодишен претседател на Олимпискиот комитет на Бразил, Карлус Артур Нузман, е осуден на казна затвор од 30 години и 11 месеци поради корупциски активности при изборот на Рио де Жанеиро за домаќин на Олимписките игри во 2016 година.
Нузман (79), кој повеќе од две децении беше на чело на Бразилскиот олимписки комитет, е прогласен за виновен по сите точки од обвинението за корупција, злосторничко здружување, перење пари и даночно затајување.
Во истата постапка на затворски казни се осудени и поранешниот гувернер на Рио де Жaнеиро, Сержиу Кабрал, бизнисменот Артус Суарис и главниот оперативец во Организацискиот комитет за Игрите 2016, Леонарду Грунер.
Истражителите утврдиле дека тројцата, заедно со Нузман, биле здружени во процесот на подмитување на поранешниот претседател на Меѓунардоната атлетска федерација (ИААФ), Сенегалецот Ламин Џак и неговиот син Папа Џак, кои посредувале во купувањето гласови за изборот на Рио за домаќин на Игрите 2016.
Францускиот весник Le Monde објави резултати од истрагата со која е утврдено дека членови на Интернационалниот олимписки комитет (ИОК) биле поткупени три денa пред гласањето во кое Рио ги победи Чикаго, Мадрид и Токио.
