Сигурно барем еднаш ви се има случено да направите салата со парчиња свежа пиперка, да ставите еден залак в уста и да сфатите дека вкусот не чини. Можеби сте помислиле дека продавачот ви подметнал лош плод или нешто сте промашиле во едноставното правење на салатата. Но, веројатно не сте помислиле дека сте употребиле погрешна, односно т.н. машка пиперка.
Иако пиперките немаат женски и машки пол, некои навистина прават ваква поделба. Со тоа тврдат дека еден вид е попогоден за термичка обработка, додека друг е повкусен кога се консумира сиров.
Земете в рака црвена, жолта и зелена пиперка и погледнете ги од долната страна. Што гледате?
Таканаречените машки пиперки од долната страна имаат 3 испакнатинки што веднаш треба да ви укажат на тоа дека таа пиперка е наменета за термичка обработка. Женската пиперка има 4 испакнатинки и треба да се јаде сирова. Има посладок вкус, па затоа слободно додадете ја во салати, сендвичи или исечкајте ја и самостојно јадете ја со омилениот сос и намаз.
Експертите, нормално, не се согласуваат со оваа поделба, а целата приказна ја нарекуваат урбана легенда. Тие велат дека пиперките може да имаат од 2 до 5 испакнатинки на долната страна и дека таа бројка нема никаква врска со слаткоста или горчината на пиперките. Напротив, вкусот на плодот зависи од квалитетот на почвата, метеоролошките прилики за време на дозревањето на зеленчукот, но и од тоа колку долго пиперката стоела на стеблото.
