Шпанија прв пат во историјата изрече затворски казни за расистичко однесување на фудбалските терени. Станува збор за тројца навивачи на Валенсија кои во мај 2023 година имаа расистички испад кон Винисиус Жуниор, бразилскиот напаѓач на Реал.
Тие се осудени на 8 месеци затвор, а освен тоа добија забрана за влез на фудбалските стадиони во Шпанија на 2 години и ќе мора да ги сносат сите судски трошоци.
Винисиус идентификувал еден од сторителите, додека другите двајца биле фатени откако биле прегледани снимките од безбедносните камери на стадионот.
Му викале дека е мајмун и го имитирале споменатото животно. Првичната казна требаше да биде поголема, но беше намалена за една третина откако тие испратија формално писмо со извинување до Реал и Винисиус.
„Оваа пресуда е одлична вест за борбата против расизмот во Шпанија и испраќа јасна порака до луѓето кои одат на фудбалски натпревар со намера да навредат некого дека ќе бидат идентификувани од Ла Лига, пријавени и ќе бидат казнени за таквото однесување“, рече претседателот на Ла Лига, Хавиер Тебас.
Ла Лига пријави 16 инциденти на расистичка злоупотреба против Винисиус до шпанските обвинители во текот на изминатите две сезони.
