Доктор Таше Трпчевски преку порака на Facebook страницата на болницата Плодност соопшти дека тројца вработени се позитивни на коронавирусот.
Заразени се двајца доктори, анестезиолог и гинеколог, како и медицинска сестра. Анестезиологот и медицинската сестра пред три дена само еден ден имале температура и блага кашлица.
Гинекологот е од Прилеп и е асимптоматски носител. Трпчевски апелира до министерот Венко Филипче да се вршат што повеќе тестирања. Тој вели дека на тој начин ќе се намали бројот на асимптоматски носители на вирусот кои сега слободно шетаат низ градот и се потенцијални вирусоносители. Тие се најопасните за околината, потенцира докторот.
„Многу полесно ќе го откриете заразениот. Има многу повеќе заразени во земјата отколку што се детектирани. Ни фали тестирање. Не знам зошто немаме масовно тестирање“, прашува докторот.
Претходно, на 28 март д-р Христијан Трпчевски од болницата Плодност објави на Facebook дека е позитивен на вирусот и повика луѓето при најмал сомнеж да се тестираат.
